Second Bite Bar & Cafe (紅磡灣中心) (已結業)

約咗幾個港女黎個又可以打卡又可以聚會嘅新地方，可能侍應都見到我地有選擇困難症，佢就推介咗我地以下呢啲菜式。原條泰式香茅鹽燒魚，🐟條魚都幾大條，上枱個陣侍應哥哥都話等佢再滾多幾分鐘先食，一路滾一路聞到啲香茅味同椰奶香飄出黎，飲啖湯底，十足冬陰公，加埋條魚好鮮，個爐又慶住佢，有少少收汁效果，越食越好味。然後哥哥話最多人點嘅小食，流沙燒粟米都黎咗，後悔只係叫咗一條，芝士同鹹蛋味突出，我覺得廚房可以考慮下落多啲燒汁再燒燒佢，再令佢重口味啲，出個重口味特別版啦！😊😊😊慢煮羊脾拌薯蓉配芝士醬，個醬我地用黎點埋粟米，自制double 芝士🤣🤣🤣，但個羊脾係有肉汁嫩滑嘅，個外皮脆脆地，連住啲骨膠原一齊放入口，增加口感。差啲漏咗嗰沙律，🥗叫到成枱肉，叫番個沙律，但你睇下，個沙律上面個油封鴨脾，唔知係咪用慢煮法，唔會太油，肉又鎖到肉汁。配上藍莓乳酪清新口感，反而個沙律最快食晒啊！👍🏻👍🏻以食物黎講，配搭真係幾特別，而餐廳又chill食完坐多陣都無問題，希望唔好贊完佢就多人排隊到食唔到啦！地點就係黃埔地鐵站行過嚟好近，今次無論係港島人定九龍人，都好滿意。贊啊！