Chin Chin Thai Cuisine (康怡廣場) (已結業)

適逢母親節，小弟我就book左間泰國野去慶祝下。好彩我有預先book到位，因為今日餐廳大排長龍。餐廳既裝修幾有格調，個人就幾鐘意個紅磚牆，特別有風味。食物方面，叫左黃咖喱牛舌同埋青咖喱羊架。兩個咖喱都做得十分出色，充斥住泰國香料既香氣，而且唔會稀，每一啖都係滿滿既咖喱香。青咖喱羊架夠哂羶，煎得外脆內嫩，加上青咖喱汁，鍾意嘅食羊既朋友絕對值得一試。黃咖喱牛舌除咗牛舌仲有好多牛筋，同樣好味。炭燒雞串同埋沙嗲豬頸肉串都係用炭爐去燒，微微燒焦，帶出炭火既香氣，附送既沙嗲醬亦都有好香花生味。香芒素菜米紙卷味道較清，芒果味相對唔夠突出。香茅炭燒豬扒燒得好香，而且入面既肉汁仲保存到，份量更加幾大份。冬陰公用料都足，有青口同蝦等海鮮，唔算好辣。佢有用爐不斷為湯加熱保温，呢點做得幾貼心。砂煲雜菜粉絲原本係用砂煲黎裝的，但係餐廳因為唔夠砂煲而轉用左碟去盛載。粉絲夠香且有彈性，都唔錯。值得一提既係餐廳員工好似唔夠應付繁忙時段既需求，員工每位都好忙，有時都要等一陣先等到人黎幫忙。