星巴克咖啡 (已結業)

舊年強颱風「山竹」襲港，摧毀多處地方，而中環「都爹利街」街尾嘅古蹟「煤氣燈樓梯」都損毀得非常嚴重，左邊扶手成條冧晒。最近，卒之修復好晒，不過，就變得青靚白淨好多，少咗份歷史味。而樓梯旁喺全世界獨一無二以冰室為主題嘅「星巴克」，相信內裡唔使小弟多介紹，應該有唔少人上載過環境相到各類社交平台。今日突然想食啲甜嘢，所以，就買咗一小件蛋糕當下午茶。雖然只喺買一小件蛋糕，但都有個大大個精緻嘅紙盒，好睇就好睇，但有啲唔環保啫。所以，留起再用番，哈哈！今次試嘅蛋糕就咁叫「朱古力蛋糕」（Chocolate Marquise），賣$35，一身「黑掹掹」，其實一共有4層，跟之前晌「The Coffee Academic」所食嘅「King of Cocoa」都幾相似，因為都喺朱古力海綿蛋糕跟高密度實淨啲嘅朱古力蛋糕，一層疊一層，面頭再鋪滿唂咕粉，所以，入口好強嘅實在感，朱古力味勁濃郁，帶點甘苦味，好啱口味。近排，都真喺諸事不順，不過，晌下午抖一抖嘅時段中，嘆番件高質素、好食嘅蛋糕，雖未至於100%上晒力，但至少個人感覺無咁鬱悶。