Knockbox Coffee Company (已搬遷) 新店位置

黑布街不嬲都係旺角美食集中地，一支公唔知食咩好，總會黎黑布街打個轉。今日口痕痕，想食個all day breakfast，就決定要幫襯Knockbox。嗌左一份All day breakfast加Cold Brew。個cold brew好有驚喜！第一啖落口，口感好厚身，淡果香，未去到酸，仲有啲杏仁味。而且佢仲有張卡仔介紹隻豆黎自幾高嘅地方，感覺好正。而all day breakfast方面，佢嘅菇有肉地，而且炒出黎唔會太油。蛋就邊位老咗小小，好彩中間夠滑，如果邊位滑啲就perfect。中間嘅炸腸好好食，外層好脆，中間豬肉腸又好濃味，整體不錯。鋪頭唔大，但作為嘆咖啡嘅地方，絕對值得一試。