新麻蒲 BBQ (波斯富街) (已結業)

成日經過銅鑼灣廣場一期，都會見到對面新麻蒲個招牌，今日就約左朋友2個黎試下。餐牌都幾多選擇，有得單點烤肉、石頭飯、甜品或者叫set，我同朋友咩都想食少少，最後叫左個烤肉達人2人餐同果醋汁。好快佢就上左前菜，泡菜、海帶、沙律菜……個海帶甜甜酸酸好開胃，沙律菜配芝麻汁好fresh，D芝麻汁真係好芝麻味，同平日食開既日式芝麻汁唔同，可以一試。個2人餐有唔同既豬同牛既部位，有護心肉、牛肋排、五花腩、霜降牛肉、連豬皮都有。燒豬皮都幾得意，未試過。我就最鐘意食牛護心肉同牛肋骨啦，份量都好足。原本我同朋友仲叫左白飯配烤肉，但最後只食烤肉都好夠飽了。可以用生菜包住D肉食，加佢個自制醬汁，都好吃。餐廳服務都幾好，個侍應(韓妹？)講英文教我地燒D咩先，又會幫你換爐面……同朋友可以慢慢燒，卡位坐得舒服，又唔會有人趕你，餐廳係銅鑼灣黎講，算好ok。見到佢另外有D promotion好抵，但要預約，下次再黎食過啦。