滋味屋日本家庭料理 (已結業)

D2 place二期比較多貴餐廳，比較少去一期，所以今次去一期睇下有咩食。早排係Openrice見到有呢間日本餐廳，所以諗住嚟試吓。本身以為同一般日本便當無咩分別，仲可以買便當外賣，點知堂食又幾好味。餐廳環境比較開揚，啲枱櫈都係開放式。-溫泉蛋鰻魚飯見到有吉列豬扒飯都幾吸引，但係驚熱氣，所以都係揀返鰻魚飯。碗飯一上枱個陣好熱辣辣，特別之處係，鰻魚唔係原條咁上，而係切成碎粒。仲有一隻溫泉蛋，做到流心嘅狀態。最正係溫泉蛋口感偏涼，但鰻魚飯好熱， 一溫一涼加埋個口感好特別。鰻魚粒同醬汁啱啱好，送晒成碗飯都無問題。整體都令我覺得好驚喜，可惜大部分鰻魚粒有骨，如果可以改善呢樣野就完美啦。-車仔綠茶跟餐可以揀湯或者茶，當日我就揀咗熱茶。後來同事講我先知道車仔綠茶都唔係平嘅貨色，原來佢哋嘅用茶都幾講究，但係個人認為茶味偏淡，冇乜綠茶香。