Little Old Town (已結業)

好耐之前喺依間餐廳食過一次肉骨茶，到依家仲念念不忘。今日難得經開九龍灣，於是就黎重溫番肉骨茶。今次我地除左點左肉骨茶，仲點左菠蘿海鮮炒飯同埋兩款甜品—西米糕、千層糕。依度嘅肉骨茶係成個爐上，下面有火㷫住肉骨茶，所以個肉骨茶食到尾都係熱辣辣，冬天食好保暖。肉骨茶湯底重藥材味，再加少少黑胡椒嘅辣，非常開胃。肉煲得好軟腍，好入味；豆卜同油炸鬼放入湯度索曬湯入面嘅精華，簡直係食到停唔到口。今次我另外叫左一碗雞油飯，飯雖然睇落淡色，但係味道十足，非常惹味，配上肉骨茶格外好食！菠蘿海鮮炒飯賣相吸引，睇落唔太油。至於味道方面，由於我無試到嘅關係，所以係無從得知。甜品方面，左邊嘅西米糕入面加入左芋頭，味道略甜，不過依個唔係我食過最好食嘅西米糕。千層糕反而有驚喜。其實依個千層糕可以話係無乜味，唔係好甜，但係食落有淡淡嘅香味，咬落口感非常煙韌，值得推介。