發哥粥底海鮮火鍋 (已結業)

之前食過發哥海鮮火鍋觀塘分店，聽朋友講發喺大圍顯徑邨開左分店，於是就約朋友一齊去試一試。 本來今次想試吓發哥嘅雞煲，但朋友唔食得辣，所以都係食返海鮮首先送上熱辣辣嘅時令燉湯，今晚係響螺雞腳湯，足料燉制，夠滋補。主角海鮮拼盤，蟹同龍蝦新鮮劏，上碟仲識郁，龍蝦厚肉鮮甜，聖子皇夠大隻，啖啖肉，貝類無沙，值得一讚。食完海鮮拼盤，可以自選8款配料牛魔王必揀安格斯牛肩肉牛肉味濃郁，厚薄適中，一啖一片，有淡淡嘅牛油香味。我哋仲揀咗順德魚腐，魚皮餃，美國肥牛，自家製墨魚滑，海蝦等...美國肥牛雖然無安格斯牛咁香肉味，但整體唔錯。墨魚滑食到粒粒墨魚肉，彈牙。拼盤有海蝦，鮮甜唔會霉，所以自選再揀海蝦食到尾聲，職員會加南瓜，粟米，芋頭嚟煮粥，所有海鮮精華就濃縮喺鍋粥裏面，又一次食到捧住個肚走，滿足！