雲南桂林過橋米線 (已結業)

估唔到咁快就嚟 encore！噚日下晝都係諗唔到食乜嘢，唔想諗就決定去呢間質素最有保證嘅米線舖食午飯！過咗飯市先去就冇咁多人，今日咁啱未過，入面爆晒，阿姐搵咗張近門口嘅單人圓枱比我坐，張枱好精緻，不過門口位人多出入冷氣唔得，頂得順先好坐！雖然平時好鍾意食腩肉，但係佢啲豬軟骨其實都好好食！ 今日就揀佢啦！叫咗豬軟骨小鍋米線小辣，加一杯凍鴛鴦。米線仍然係水準之作，唔會又稔又斷，湯底勁濃勁好味，不過真係要叫杯嘢飲吓，因為好難唔清吓個口再飲啲湯！豬軟骨條骨真係整到稔晒透晒，咬落仲有啲脆，連大嚿嘅都食得到！杯茶都算濃，而且夠大杯，碗米線真係好多，次次食完都要坐一陣先行得，因為實在太飽啦！