Follow (已結業)

同朋友闊別多年，難得一聚，為食嘅佢就follow我食Follow。隔條馬路已經認得佢同埋Follow。餐廳外面已經係小花園，放置咗各種小盆栽、攀爬植物。室內環境都有心思，枱上有燭台、小燈泡等，增添氣氛。黎到就嘆個二人餐。頭盤有足料凱撒沙律，有幾片富咸香味嘅Parma Ham。沙律上面灑滿芝士，果仁增添脆口口感。是日餐湯係椰菜湯 ，將椰菜打至蓉，口感較杰，味道清新。前菜有意大利雲吞，好「芝」味，一咬就食到blue cheese味。蕃茄醬微微帶酸，中和咗芝士嘅膩。主菜肉類二選一，選擇燒西班牙豬鞍配薯菜，為是日驚喜。豬鞍好厚身，但一啲都唔嚡，亦唔會似落咗好多鬆肉粉咁散曬。肉質外燒到香脆，內柔軟，富滿肉汁。伴碟有燒蔬菜同薯球。木板上嘅一點點係Washabi薄荷醬，增加味道層次。另一主菜係酸奶忌廉封門柳闊條麵。封門柳七成熟，口感柔軟。肉味十分濃郁。第一次食加入酸奶嘅忌廉汁，有微微酸奶味，好特別。質地比平時更濃郁、杰身。闊條麵煮得剛剛好，每一條都平均沾上忌廉汁溝少少牛肉肉汁嘅濃厚醬汁。飲品用黎打卡一流，兩個富士山分別係焙茶鮮奶同士多啤梨鮮奶。焙茶同牛奶比例好好，而士多啤梨鮮奶酸酸甜甜。整體值得二訪