OH MY GOOSE! (已結業)

※本文以用餐當日的環境、服務和食物質素為準，口味亦因人而異，文章只作參考之用。.唔知大家覺唔覺得雖然朗豪坊係大商場，但晚餐要係入面搵間餐廳食揀極都唔多岩心水，好多時都會出返大街搵其他餐廳。或者時不時有新餐廳進駐既四樓Food Court，偶然都有唔錯既選擇。「Oh my Goose!」主打食港式燒賣，餐牌除左一般單併雙併燒味飯、粉麵外，仲有幾款較特別既配搭，好似芝士焗叉燒飯、黑松露手撕雞蔥油飯、鐵板海膽什菌炆飯配燒鵝肉等。可惜想食既芝士焗叉燒飯已經無再用鐵板上，便改要左個滑蛋叉燒飯。北海道牛乳滑蛋叉燒飯 $45個賣相都幾靚，滑蛋食落算滑都唔錯，有蛋香但唔算好重，切粒叉燒就正常無驚艷，面頭加左蔥粒提升味道，可以一試，如果甜豉油可以另上比客人自己倒就更好。黯然叉燒飯 $52黯然叉燒飯唔知係咪忘記叫肥叉，食落肉質稍乾，唔夠蜜汁味，男人就覺得可以，但都已比同區某商場的米芝蓮既黯然叉燒飯好多了！爆檸茶 跟餐+$8加入左青檸、檸檬同咸檸既爆檸茶，飲落同平時既檸茶無咩分別，不過加$8算大杯，茶底唔會太澀或太淡，都可以！整體黎講，雖然稱不上相當美味，但以food court黎講已經算不錯了，可以一試！