深仔記 (已結業)

今日約左個死黨踩單車，踩左成日梗係第一時間醫肚。見到有間餐廳，寫住「十大受歡迎雲吞麵檔」，就等我試下你係咪名符其實。叫左個牛腩蝦子撈麵。呢個撈麵真係不得了，啲蝦子鋪到成個面都係，真心足料抵讚。牛腩新鮮，無膻味，唔硬又唔會過腍。麵質爽彈，唔重鹼水味，亦唔乾身。湯保持熱辣辣，配撈麵一流。同行朋友食左佢地既雲吞河話啲雲吞好新鮮又多蝦。麵店個吖姐聽到即話，呢到啲雲吞係招牌黎。好，就叫埋個炸雲吞試下。68蚊有10粒，炸埋先6.8一粒，抵。一上枱，顛覆左對炸雲吞既印象。因為平時酒樓食開既炸雲吞，都係多皮少肉。但佢就粒粒都啖啖肉，脆皮少。一食落口，啲雲吞的皮超薄，蝦肉真係同朋友講一樣好新鮮。雖然係炸出黎，但唔覺得油，每隻雲吞都好乾身，油溫要控制得好先會咁乾身同唔出油。見佢啲野咁靚，唔encore真係對唔住自己。試埋個炸水餃，一樣炸得好好食，乾身唔油膩，啲餡料仲有汁添。明明食完冇耐，一路打食評已經有種衝動想再食一次，真心值得推薦。