鳥棲日本料理 (已結業)

鍾意自己帶酒。成日都要周圍搵free corkage嘅餐廳。上次路過見到呢一間新開嘅餐廳大部份都係梳化位。想坐得舒服啲於是就嘗試問下。結果係free corkage。望一望個Menu。食物嘅價錢平。分量就細細份咁。絕對啱晒2個人黎又好想試好多唔同野嘅人。前菜叫左磯煮鮑魚。芝士明太子蛋卷。鮑魚彈牙入味。不過就冇乜鮮味。配埋嘅醬油過鹹可以唔用。蛋卷有驚喜。芝士蛋卷上面有一條明太子。明太子微辣又唔會過鹹。配搭一絕。串燒叫咗牛舌。雞腎。和牛。大蔥雞肉。牛肉雞肉麻麻。不過雞腎牛舌大讚。厚切爽口。調味亦足。茄子已經去皮。厚肉多汁。配上日式甜面醬。味道清甜。一夜干有驚喜。味道適中有鹹香味。雖然油脂唔夠。不過魚肉好厚。以呢個價錢質素非常高。同白酒十分配合。炸墨魚咀選用大粒墨魚嘴。所以入口時有汁又有咬口。不過略嫌俾七味粉搶晒啲味。同埋份量較少。天婦羅大讚。炸漿夠薄。南瓜夠甜。明顯炸嘅時候有再洒炸漿落天婦羅上面。所以天婦羅面有好多又散又脆嘅炸漿。以呢個價錢食咗咁多嘢真係性價比超高。開放式廚房亦冇令到餐廳有一陣油味。餐廳冇限時。2人都係坐4人枱。大讚。不過就只收現金。記得帶錢食飯。