Duke's Deli (已結業)

今日中午和同事去蓮香飲茶，食到好飽，到三點幾又每人叫咗個下午茶餐外送，飽到晚上都唔係好想食飯。放工後經過 Duke's Deli, 見有個朱古力嘅物體，叫 Frou Frou Cake ($28), 賣相好似幾靚，一於買呢件蛋糕夜晚做宵夜。美心喺情人節嗰排都出過一款 Frou Frou Cake, 中文名叫「特濃朱古力脆米蛋糕」, 又睇吓呢件cake 嘅朱古力係咪特濃先。晚飯後同亞仔兩個朱古力怪又出動，齊齊瓜分件cake. 呢件蛋糕外觀非常美麗，表面好光滑，令蠟蠟，好似迷你版嘅帝苑 chocolate truffle, 當然價錢就有天淵之別啦。我地用刀把蛋糕切開，發現外層是用朱古力漿包住內裏嘅朱古力 mousse, 用叉子把蛋糕一小塊、一小塊的放入口中，唔！濃郁嘅朱古力味在口中不斷迴盪，蛋糕頂嘅棉花糖同小菓子中和番個甜味，雖然唔係好似帝苑件 cake 咁，用蛋糕及 mousse 幾層相間，但食起嚟一啲都唔“漏”， 依家回想起來仍然好想再吃多次呢！