Goobne Chicken (荃新天地)

營業中

休息中

之前食過Goobne Chicken嘅銅鑼灣分店，覺得食物唔錯，呢日就同人去咗荃灣分店試試。餐牌用色就比較可愛風，似乎唔同分店想營造唔同風格。Somersby Apple Rita，酸酸甜甜嘅沙冰，加上整支倒轉放嘅Somersby Apple Cider，酒味唔濃，女仔飲就啱啱好。Blue Orangeade，相對起嚟呢款嘅橙味就唔出，以甜味為主。海鮮鍋巴湯，湯內有大蝦、藍青口同蝦仁等等，另外仲有木耳、雞髀菇、蘑菇、本菇、小棠菜、洋蔥、青紅椒同辣椒等等，份量算多。鍋巴已預先放晌湯中，一面脆口，另一面就被湯浸到軟身。湯質較濃稠，有啲似中式湯羹，辣度比較輕微。蜜糖咖哩烤雞，淋上烤杏仁片以增加口感。烤雞外皮沾滿蜜糖，脆口肉嫩，當中仲有微微咖哩粉香。亦可蘸另附上嘅芥末醬，味道唔嗆，又係另一種感覺。