% Arabica (國際金融中心商場)

營業中

休息中

今日去開中環，行過ifc 見到有一間咖啡店，都幾多人排，所以就想買翻屋企同屋企人飲。喱到都幾靚，行簡約風。睇睇個menu ,發覺選擇唔多，冇其他特飲，只賣咖啡。但啲choice 都幾特別，其中吸引到我嘅有西班牙拿鐵，從來都無飲。我一共叫咗四杯：西班牙咖啡（凍熱各一），咖啡拿鐵（凍），抹茶拿鐵（熱）。如果你哋鍾意飲咖啡比較濃，帶有苦味就選擇咖啡拿鐵，如果鍾意帶少少苦，奶味濃就選擇西班牙拿鐵。而唔鍾意飲咖啡嘅，就可以選擇抹茶拿鐵。熱飲嘅飲品仲會有埋有拉花。我就比較中意抹茶拿鐵同西班牙拿鐵，抹茶拿鐵好飲，奶味好香，最好就係距唔係好甜。而西巴牙拿鐵就啱我唔係好受苦澀味嘅人啦，微苦咖啡味濃帶好香奶味，而且好滑。個人比較喜歡熱飲，感覺熱飲味道會更濃。另外值得一提嘅係，原來呢間咖啡店仲有賣咖啡豆，有啲簡介俾大家睇添，唔明仲可以問職員。飲咗佢哋呢度嘅咖啡，我都心思思想買返包咖啡豆返去自己沖黎飲。每杯咖啡大概$40-$50左右，喺中環來講，呢個價錢都算抵，如果你鍾意咖啡，我非常推薦大家嚟試吓。