Todai (已結業)

第一次幫襯美麗華商場地庫TODAI的自助餐，平日午餐時間一樣大班人喺門口排隊入場同等位，記住要預先訂位，如果唔係嚟到要等又未必有位呀。呢度的Lunch Buffet出名多壽司，細細件可以試多幾款，又冇咁易飽。熱葷有燒魷魚筒、鰻魚蒸蛋、小籠包、煎薯餅、pizza、天婦羅、煎餃子、即製的湯麵等。左面的羊腿肉嫰口又有肉汁，右面的三文魚頭好多肉又滑又香，非常正，我食咗好多件。香草焗青口好好味！甜品有好多選擇，亦都係細細件，方便你試多幾款，蘆薈加糖水平時喺Buffet好少見到，蛋糕味道就麻麻哋。仲有即製pancake，朱古力噴泉，雪糕都有好幾款，仲有朱古力雪糕粒。總括嚟講，百幾蚊價錢有咁多選擇，真係好抵食，味道比一般酒店Buffet仲好，但如果只係想食壽司同魚生的，就建議去有質素的任食日本菜，價錢差不多，又新鮮熱辣一啲。