Su Casa (已搬遷) 新店位置

沙田石門越開越多食店，Su Casa係我會返轉頭的一間，樓底高，坐得舒適，西餐做得出色。是日餐湯配蒜蓉包，鮮茄忌廉湯又香又滑，香脆蒜蓉包食完再想食多塊。日式鰻魚玉子炒飯~炒飯功夫好到家，鰻魚香味滲入飯粒中，肚餓一定要揀佢。小虎蝦拿破崙意粉~醬汁做得出色，小虎蝦爽口彈牙夠新鮮。西班牙辣肉腸雜錦波菜意大利飯~芝士忌廉汁配合辣肉腸係少有的做法，這個創新令飯唔會覺得太油膩。軟殼蟹明太子忌廉扁意粉~軟殼蟹脆卜卜，這個fusion菜好受阿女喜愛。加拿大無骨豬扒配燒汁~需要耐心等候，最遲先上，厚厚豬扒，高溫烹煮能鎖住豐富肉汁。午餐包一杯凍或暖的菠蘿有機奇亞籽綠茶，健康有益，也可加錢點選咖啡。最後甜品出場，朱古力蛋糕人人喜愛。