4號烤吧 (已結業)

📍4號烤吧西環卑路乍街116-122號聯康新樓1樓A號舖Happy Friday 飲飽食醉之選！可以玩到凌晨兩點～舖頭幾大，佢哋仲有間私家房好似partyroom咁，最低消費$6000，不過上次打去問已經full咗。 我哋10條友$6000幾埋單，覺得蝕咗間房。同埋有一樣好重要嘅嘢係 —— 廁所！舖頭冇廁所，要用商場廁所。玩咁多個鐘再加上飲酒利尿，一定會去個廁所，但女廁好大陣煙味、燈光陰暗、冇提供廁紙，最重要嘅係廁所冇廁板，要無影凳！即刻飲少兩杯。呢間有好多唔同嘅嘢食 —— 雞煲、烤魚、串燒。但食物質素中等，係食氣氛。叫咗個肥腸雞煲，會比較重口味，同埋唔多雞，個汁留返嚟打邊爐都好油。肥腸味道就唔錯，都煮得腍！打邊爐嘅料係好普通嘅港式邊爐嘅料，值得一提嘅係象拔蚌好好食！鮮甜爽口～我不嬲都麻麻哋烤魚，我覺得條魚有啲啲鞋，個湯底又好重胡椒味， 唔係好鍾意。串燒就不錯，起碼唔係所有野都落孜然粉調味先。燒菠蘿最好食，酸酸甜甜，一咬落去啖啖汁咇出嚟。雞軟骨都唔錯，卜卜脆，又唔會燒得太乾。牛舌係超厚切，好重牛味，但切薄返少少會更鍾意～烤雞泡魚乾必食，燒得啱啱好，平時食開好乾好硬，但呢間唔會其他就冇咩