食嘢 (已結業)

3點多才喺大埔辦完事, 雙台風迫近香港, 熱到坐係度都標汗, 意識不斷同自己講.....我要飲凍嘢, 我要飲凍嘢, 我要飲凍嘢.......咁啱竟然見到一間叫'飲嘢'嘅店舗, e.....隔離個間鋪叫'食嘢', 都幾搞鬼, 午飯都未食當然入去'食嘢'啦。'食嘢'屬於小型的簡約小店Tea time 除咗輕盈的tea set, 還有重形型的飯、麵、意套餐精選, 要幾飽有幾飽, 我就叫咗個全雞拼盤。符碌特飲 (餐飲加配+$20)我要飲嘢…..我要飲嘢.....一定要大大杯, 呢杯符碌特飲一啲都唔符碌, 除咗夠大杯夠凍外, 裡面還有新鮮的西瓜、橙、檸檬、青檸、奇異果、波蘿等, 清新果香, 冰凍又解渴, 果味香, 但只是微甜, 飲完仲可以將新鮮果肉全部食落肚, 超級涼快。全雞拼盤 ($68連飲品）內有一隻蜜糖雞脾、三隻蜜糖雞雞翼、雞扒及沙律菜。炸雞脾 ~ 大大隻, 用調味料醃入味後才炸, 炸得色澤金黃, 皮脆肉嫩, 雞髀肉炸完還有肉汁的, 一啲都唔鞋口。 蜜糖雞翼 ~ 同雞脾做法一樣, 加埋少許蜜糖汁, 香香甜甜又嫩滑, 正炸雞扒 ~ 相對嚟講就比較失色, 炸漿太厚, 比較油膩。