海港酒家 (已結業)

海港可以話係多間酒樓中至抵食架啦！雖然服務認真麻麻，酒樓又嘈又多人，但勝在價錢實惠，坐下食餐飯都幾唔錯。海南椰子雞鍋四人餐雖然我地只有三人，但都點四人餐啦！都係一人百幾姐，有齊11款食物兼有飲品。椰子鍋真有幾條椰子，算唔錯。湯底係椰子水，幾清甜。有成隻雞！雞都算大隻啦，絕對唔係無肉食果種。三個人食其實有點多。食剩好多舊呀。四人就應該岩岩好。雞肉加入椰子湯底入面煮，雞肉都有清香嘅椰子味，都幾正，別有一番風味。手切安格斯肥牛都幾大片，牛肉味都幾濃郁。而且，肉質都算幾嫩滑。西班牙黑豚肉煮耐左都唔會鞋，算厚切。松露墨魚丸好香嘅松露味道，咬落去果下香味特別重。魚丸好彈牙，仲有粒粒墨魚肉。黑蒜豚肉丸黑蒜嘅味道唔算太重，反而豬肉味勁啲，算係唔錯啦。