阿來東南亞風味 (已結業)

今晚真的熱到爆，決定食泰菜，貪佢夠涼快吖嘛。唔想煩，當然叫餐最實際。二人餐有三個選擇，唔同價位，有不同配搭，定價都幾合理。我地叫左二人餐 B ，盛惠 $248。主菜二選一，分別係豬脾或海南雞，望望隔離的滷豬脾 ，例牌得來都幾大碟，就佢啦！豬脾肉夠軟，豬皮同豬肉都展現完美的 balance 。一啖咬佢，好入味加上唔油膩，招牌菜冇誤。套餐可選白飯及油飯，俾大家多個選擇。豬脾下層仲有好多菜，索囇D滷水汁真係幾和味。伴碟仲有酸菜及滷水蛋，有誠意的。泰式生蝦刺身估唔到小舖都食到生蝦刺身，size 夠大隻，而且爽肉。冰鎮上的生蝦，見到都覺得透心涼。點吓旁邊配的青辣醬，辣到跳舞，十分過癮。泰式肉碎生菜包生菜包，抵食交大份。生菜夠新鮮而且洗得勁乾淨，抵讚生菜包唔辣，呢到失左少少分數，唯有自己加辣加調味。咸檸七 & 青檸梳打大大杯，足料又多冰，啱曬炎炎夏日慢慢歎。裝修幾親民，爆場氣氛熱鬧，除左港人，仲有不少外國客支持 整體來說各方面都不錯，又抵食，會再來。