La Rotisserie (廈門街) (已結業)

又係假期先嚟落雨，即上Openrice搵食，搵到呢間想試好耐嘅烤雞，同阿媽兩個人外賣咗半隻雞、三文治、焗薯、湯同甜品，原來加加埋埋都好有份量，最後係每樣都食淨返啲，不過呢個價錢真係幾抵食。🍴1/4 French Roast Chicken $58 (買一送一)比$58就有半隻烤雞真係好抵，話晒招牌對佢期望好高，外賣時有錫紙袋入住，回家路程約十分鐘，但雞已唔熱，食落口感仲係乾同鞋口，唔知係咪當日無乜客關係呢...總之唔會再回頭啦！🍴French Roast Duck Sandwich set $125 + Roast Potatoes + Homemade Soup + Chocolate Cake呢個法式三文治超巨，長度長過隻雞，仲要啲料多到爆晒出嚟，個沙律醬＋BBQ醬非常惹味，至於鴨就太大件，一咬個包啲料就跌晒出嚟，如果切片會方便容易食好多；至於焗薯就唔ok，焗過龍變得又乾又硬，全無口感味道可言；個湯仲差，成個糊仔咁，而且一啲咸味都無，隱若飲到淡淡蔬菜味，大家飲咗兩啖就放棄咗！最後嚟個朱古力蛋糕，味道似brownie 但濕潤版，朱古力味濃，全晚最似樣嘅食物。