Lady M

營業中

休息中

朋友遠從外國回來，我請佢食飯，佢禮尚往來請我食Lady M千層蛋糕。其實沙田分店開幕已有一段時間，亦聽聞不少朋友都讚口不絕，有時經過都會睇見長長人龍。雖然想一試，但超級無耐性既我係唔會等位。今晚將近8點半，真係唔洗等位ORDER完蛋糕就即刻可以入座。埋白講我無咩期望，因為好多時排長龍店慕名多過欣賞食物品質。朋友話佢最近試過玫瑰千層蛋糕，所以今日試原味，我當然照跟，而且第一次食梗係食原味啦。店員好快端上兩碟千層蛋糕，單看外表同其他店舖既千層蛋糕分別不大，不過如果仔細一睇就會發現它的"千層"真係好"千層"。如果你想數吓幾多層，應該數好多次都數唔準，唔似其他千層蛋糕咁十隻手指數得到。當我食第一啖既時候。咦?! 真係幾好食喎。啲CREAM好滑而且啲蛋糕皮唔會好厚，感覺唔膩。呢點好重要，因為我啱啱同朋友食咗餐好飽，如果太多CREAM或太膩，真係會食唔落。不過，如果佢地整得唔好食，賣咁貴就唔值喇。呢個質素係值呢個價錢，不過真係有啲貴。關於千層蛋糕既卡路里就。。。有時都要食吓啲好食既嘢而暫時唔會計較卡路里。