nami.yoshoku

營業中

休息中

今日返工放飯嘅時候，咁啱見到三哥樓上有間新餐廳，見到個餐牌都幾吸引就上去食。Lunch有set menu，主要係以西餐為主，本身都想試佢個港式臘味卡邦尼意粉，但因為又想食肉，所以就叫咗個紅酒燴牛面頰意粉。落咗order冇耐就上咗個免費嘅雲丹豆腐前菜，顧名思義就係海膽豆腐配日式醬汁，海膽嘅份量非常足夠，而且亦非常巧妙咁用咗偏硬身嘅豆腐，同海膽帶出咗個差別，口感更加豐富，而且配日式汁，做到開胃嘅感覺。同同事傾咗陣偈，牛面頰意粉就整好，試多次覺得幾大驚喜。平時食到紅酒燴牛面頰都係忟到軟爛，而且會有機會因為想入味啲，而搞到外層太鹹。但係呢度嘅牛面頰口感啱啱好，咬落去軟熟，但仲有肉嘅質感，而且牛面頰本身係有少少筋喺入邊，每一啖都有好重嘅膠質，感覺自己食咗好多骨膠原落肚。而且佢喺咁長時間嘅烹調下，都無令塊牛面頰有過鹹嘅情況，相信係烹調嘅時間上面都花咗唔少心機。總括而言，呢一間餐廳嘅質素絕對對得住價錢，平時經過不妨試吓。