Him’s (中海日升中心) (已結業)

星期五嘅team lunch去咗呢間Him’s 餐廳食， 話就話係team lunch, 其實得四個人。 大約1:15到， 去到都有好多人等位。 等咗大約10分鐘就有位， 其間， 斜對面有間餐廳可能冇乜人幫襯， 個阿叔好落力叫人唔好浪費時間， 浪費公錢， 叫大家過去幫襯喎、但佢把聲實在大刺耳， 頂唔順！ 未正式安排入坐時已經點好野食。 是日叫咗牛扒配cuttle fish sauce(唔記得中文係咩）配飯， 餐湯同埋沙律之間，我揀咗沙律。一坐低，沙律就即刻送上枱面，沙律係沙律菜加豆腐配日式芝麻醬，味道不過不失， 舊豆腐都幾滑。 主菜好快就上枱，食咗一啖飯先，覺得個飯有少少味道，唔知點樣形容，我同事話有味嘅原因係冇洗米， 不過都接受到嘅。 塊牛扒冇肉味，食粉落多咗小小、而個墨汁醬就變咗日式燒汁。 買單連凍飲93蚊， 呢個價錢可以有好多高質選擇。 但呢間餐廳有做善事幫有需要嘅人， 比返個like你啦。