山下菓子 (T.O.P This is Our Place)

營業中

休息中

位於旺角T.O.P.嘅山下菓子今次同日本人氣貓貓mofusand搞主題cafe，場內有幾十隻甜品造型嘅mofusand貓貓，唔同食物類型亦會有唔同貓貓裝飾同贈品，好適合貓迷去打卡嫁🐾主食方面無論飯同意粉都偏辣濃味，香噴噴嘅和牛漢堡蛋包飯上面仲有大大個可愛貓貓手印，影夠先捨得食；為咗要個托盤所以叫咗小食拼盤，份量唔算多，薯條同明太子雞翼炸得好香，貓爪奶油曲奇都幾鬆化。甜品叫咗最愛tiramisu梳乎厘，可惜有少少過熟令外層較厚，食落空氣感略為不足，但味道唔錯，用料足蛋香味濃。飲品如果揀凍飲會送鎖匙扣，熱飲會送一隻貓貓杯，無論咖啡定花茶類都有嫁，抹茶拿鐵奶味濃帶微微綠茶香，甜甜地唔會有抹茶過濃嘅苦澀。