Ember (已結業)

今日約咗老公喺銅鑼灣食晚飯，佢話同事好介紹，呢間餐廳好有氣氛，沿著鹅頸橋行過咗灣仔消防局好快就到。今日星期一，未到七點，餐廳已經有不少食客，大家放工就可以落嚟happy hour。餐廳整晚播放著輕鬆英文歌/音樂，心情也感覺很愉快。凱撒沙律，羅馬生菜配新鮮車厘茄，沙律汁唔會太多，灑滿乾煙肉碎，醒胃最啱。法式龍蝦湯配蒜蓉包，這個湯又香又濃，如果份量再多一些會更理想。西班牙黑毛豬火腿菠蘿比薩，廚師毫不吝嗇，落咗好多蕃茄醬同芝士，但冇影响餅底，依然脆卜卜，火箭菜好香口，黑毛豬火腿味道夠，菠蘿細細粒，唔會蓋過主角的特色，恰到鮮味。烤西班牙黑毛豬扒伴荷蘭豆燒手指薯配燒汁，這個也是黑毛豬，但完全是另一個食法呢！豬扒厚切香煎，唔會太熟也唔韌，絕對保存到肥美的肉汁，堅好食，食到停唔到口，沾一些燒汁會更突顯豬肉的鮮味，整個菜很完美。大家都好鍾意菠蘿，我們每人都叫咗杯Music Tower，賣相好吸引，用新鮮菠蘿條喺杯上面砌左幾個"井"字，菠蘿熟曬，好甜，飲品本身主要係菠蘿汁，也有一些芒果汁及檸檬汁，味道都好夾。這裏也有許多不同款式的小食，下次搵朋友嚟傾計就最啱。