Ocio (東港城) (已結業)

為食之旅第二擊，由觀塘黎到將軍澳，居然俾我見到Ocio，上個禮拜先去過旺角個間，食完唔係好夠喉，原來將軍澳東港城都有分店，真有緣，不如快手食個甜品。上次見到佢地d熱香餅已經好想試，決定揀我最鍾意既抹茶紅豆味。鑊仔抹茶紅豆雪山熱香餅 $79+10％落左單之後超快就食得。個抹茶味熱香餅好大份，好似海綿蛋糕，軟軟熟熟，有淡淡既抹茶味。個熱香餅明顯係個鑊仔度整熱，上凍下熱。上面一球抹茶味雪糕，味道都唔錯，好鍾意佢下底好多粒粒紅豆同杏仁脆片係熱抹茶漿度，加埋凍雪糕一齊食，冷熱交融，脆軟綿滑，口感複雜，味道超夾。另外叫左杯野飲。草莓奶昔 $45+10%草莓奶昔好大杯，草莓味同奶味適中唔太甜，上面好似仲有草莓雪糕溶緊凍冰冰，好飲。上菜超快，坐低食完唔洗半個鐘。呢度舖頭光猛，座位舒適，鬆動過旺角舖好多。今日又試左個好正既甜品，作為一個慶祝活動都唔錯。