漁吉海鮮丼專門店 (已搬遷) 新店位置

蜜桃小丸子再戰九龍城，今次就試日本菜。漁吉嘅裝修好新淨，舖頭唔算大，但因為我地嚟得早，所以可以坐四人枱坐得舒舒服服，食到後尾已經愈來愈多人了。枱面有用保溫器盛着暖的味噌湯，可以隨便飲，仲有溫馨小提示教你要先搖一搖，令到佢均勻啲。味道對於蜜桃小丸子嚟講咸咗啲，但都幾有鮮味。餐紙上主要有丼物、蒸蛋同一啲小食比你揀，款式唔算多。首先叫咗個豪快海鮮丼。賣相好靚，啲甜蝦都幾新鮮；帆立貝得一片薄薄的，少少燒過，香香地；有種唔知是什麼嘅直送鮮魚，味道有啲古怪，酸酸地；三文魚唔肥，但切得都算厚厚地；油甘魚都新鮮；最厲害係佢有勁多蟹籽，鋪滿係飯上，亦有好多我最愛嘅葱葱，不過啲飯真係太多，幾努力都食唔哂。另外叫咗個龍王丸，貴在個原隻龍蝦，但其實好少肉，食唔出鮮味，只係隻蝦好夠霸氣；其餘嘅餸好似三文魚、帆立貝同我上面講嘅差不多，比目魚一粒粒都新鮮。下次叫其他丼應該會化算啲。