霞小飛 (已結業)

成日經過K11地庫，想試下，呢日終於試咗。都唔錯嘅！杏汁燉豬肺湯 - 杏汁味唔多，飲到豬肉湯味多啲。味道都幾好。入面有2正方粒豬肺同2正方粒豬豬，size一樣，仲有一支豬脾仔。$48。擔擔麵 - 一般。重麻辣味，反而少咗花生醬味。湯濃，個人認為太過杰。食開嘅擔擔麵都係花生醬味重啲，無咁麻辣。蜜糖燒鱔 - $138。好食。用蜜糖燒鱔，無骨，脆脆哋、甜甜哋、又香。周圍都比較難搵到鱔食，呢度竟然有，即試。好在都無失望。玫瑰花饅頭 - 見係母親節正日，玫瑰花又粉紅色，都幾靚，叫來應下節。真樣都幾靚，雖然有條裂縫，影相擰開都唔覺眼。有少少味，但其實係差唔多一個齋饅頭，頂同底有一粒仔蓮蓉。應下節，影下相，都ok啦！平時真係唔會叫。牛肉餅 - 唔得。入面啲牛肉係滑lu lu，唔係食滑牛喎，牛肉餅係應該有口感先啱。食過清真牛肉館，食過最好味牛肉餅，同呢個比真係高咗9班。總扣，都ok嘅。有機會再試其他。埋單$350。