沙嗲王 (已結業)

本身我哋諗住去牛角食燒肉嘅 ，點知因為巴西肉事件嘅影響 ，好多好common嘅item 都冇得嗌， 例如牛舌都冇得叫， 所以只能夠喺附近求其搵啲嘢食。行下行下見到沙嗲王個水牌 ，求其去咗食。佢嘅餐牌而家有二人餐， 可以揀沙律/湯， 兩個主菜 ，一個小食，兩杯嘢飲，大概 200頭左右， 都唔算太貴 。我哋嗌咗一個湯，一個薯仔沙律，一個蟹粉豆腐鍋配薄餅 ，一個沙嗲肥牛粉絲 同埋椒鹽豆腐。 首先講講個湯， 真係比想像中好飲好多喎 ，因為佢真係有蘑菇粒喺入面， 幾有菇味，令人喜出望外 。薯仔沙律就不過不失冇乜特別 。蟹粉豆腐鍋 依然係幾好食， 不過 配薄餅就冇配白飯感覺 ，建議大家都係嗌返白飯 ，加五蚊 。而沙爹肥牛粉絲就麻麻哋， 沙爹汁幾濃，但啲粉絲好快就索曬水 ，冇乜彈性 。椒鹽豆腐都幾好味， 外皮脆卜卜，入面滑溜溜，幾好食。杯珍珠奶茶都幾好飲，不過如果加番少少冰 會好啲。順帶一提大家千祈唔好搭嗰部𨋢， 因為真係好恐怖 ，上一層要勁耐， 好似就快困𨋢咁，又唔係咁穩陣 ，建議大家兩層都好， 行樓梯好似好啲