La Postre (永樂街) (已結業)

今晚朋友約了去一間在上環永樂街的上樓西班牙餐廳聚舊。朋友知我是路癡話特別揀間近地鐵站口又易搵的餐廳聚聚，出了上環A2出口轉右，過咗馬路行幾步就見到CS TOWER，餐廳在3樓，可能是商業區掛，7點到連埋我哋都係4枱客。我們被安排坐喺近窗卡位，店內裝修都有點特色，大個金金屬大鐘，整體感覺有點舊式歐洲火車站感覺，電視屏就播緊D西班牙美食及旅遊片段，背景播放輕微的西班牙音樂，整體氣氛都令人很Relax。食物方面朋友點了每人一份西班牙海鮮濃湯、幾款TAPAS、烤乳豬、松葉蟹意粉同一份朱古力布朗尼窩夫。整體嚟講味道很好，西班牙海鮮濃湯有D似龍蝦湯味道，帶子口感很好; TAPAS方面特別要讚份蒜片蝦，蒜味濃、蝦彈牙、香草包點醬最好味，最重要係唔會太多油。朋友特別推薦一定要試乳豬，可能是用慢煮方式，相對其他餐廳的西班牙烤乳豬，依度的肉質會保持到鮮嫩多汁，外皮能保護西班牙烤乳豬的一貫脆度，配合烤菠蘿一齊食更正。松葉蟹意粉芝士味同海鮮味都好足，好味。報告完畢，這間叫 LA POSTRE 的西班牙餐廳，值得同大家推介下。