Mi Casa Chilean Oyster Bar (已結業)

雜誌介紹搵到呢間隱閉小店，室內佈置好warm，座位只有16個，坐得幾舒服。多數客人會先叫一客platter，當中包括5款不同種類嘅生蠔，Kumamoto, US Bald Eagle, Irish Gigas, French Special, Fine De Claire(每款2隻)，另2隻翡翠螺及2杯白酒-智利Sauvignon 2006。老闆Garry會詳細介紹食嘅先後次序同埋每款蠔嘅獨特口味。除Kumamoto較淡味外，其他幾都好特出，肥美清甜十分新鮮，蠔縠內嘅海水係精華所在，海洋味湧上心頭。其他菜亦做得非常出色，Caesar salad醬汁略淡反而更覺清新，自家製煙肉碎脆口惹味，麵包粒用牛油煎過，誠意之作；蒜茸飽無一般嘅重蒜味，撒上小量芝士才焗，另一番感受；鴨肝野菌意粉必食之選，linguine煮得剛好有咬口，能夠將麵嘅優點充份表現出來實在難得，鴨肝嘅油脂令到整碟pasta味道提升，香味四溢；Rose Mary燒春雞很嫩口，肉汁仍然保留，但火喉掌握有待進步，因為差少少未熟。一定要訂位，因為當晚有幾個walk in客想等都唔得，是關第二輪嘅枱亦已book滿。