雙城吧 (已結業)

星期日的conference晨咁早開波，事先有兩個鬼佬約了在這裡睇Formula One，個人對賽車的是麻麻地，但可以試下這裡的Pub Brunch﹝仲有人請！﹞，所以又來了。唔好以為波至多人睇，原來Formula One都好受歡迎的，星期日下午是坐到滿，當然其中以外籍人士佔大多數。呢度的brunch由十一點半食到下午四點，其實似lunch buffet多D。價錢是98蚊一位，唔貴，而食物都不少。當然沒有生蠔或涷蟹，沙律選擇都算多，亦有一盤羅馬生菜給人撈凱撒沙律，前菜我就專攻呢味；熱盤選擇不算少，有咖哩羊、咖哩角及咖哩什菜，亦有黃飯及papad去點，味道不錯亦幾受歡迎；其他熱盤則以煙肉、腸仔、焗豆、暮條等鬼佬食物為主，用來送啤酒會更適合；亦有專人煎奄列，亦有燒豬柳；甜品選擇不多，只得黑森林同桃酥餅，味道OK。咖啡或茶任飲，要叫啤酒就要另計。總括而言，以98蚊一位的價錢其實幾抵食，食物種類當然不能與二百幾三百的酒店buffet相比，但都已經唔錯，如加上有特別節目的話﹝如今日的Formula One及平日的NBA﹞就更食得過。