稻香 (已結業)

今次兩個人黎稻香食飯，大概6點幾黎到，唔洗等位。環境整齊乾淨唔錯，服務態度ok。叫左3餸1湯，食左兩百幾蚊，食到好飽。而且性價比好高，酒樓晚飯呢個價錢黎講真係算平，值得再黎食！汽鍋川芎魚頭湯。外表賣相就已經覺得好靚，打開之後見到入面d料勁足，有雞腳瘦肉同埋好多藥材，不過就唔係好見到魚頭。呢個湯藥材味會幾濃，比較似係食療嘅藥膳湯，個人幾喜歡藥材味所以好鍾意，但係如果唔太鍾意藥材味嘅朋友就要留意翻啦。紅燒石岐乳鴿隻乳鴿燒到d皮好脆，趁熱食嘅時候真係好脆好好食。d肉都幾嫩滑，仲有d肉汁，香脆可口。細細隻，兩個人食一份可以過下口癮。家鄉魚腸煎蛋份量好足夠，超大份，魚腸好多。有d蛋邊煎都好脆，好好食，又唔會話太鹹太淡，啱啱好。醬皇栗子雞煲個雞煲上到黎熱辣辣，味道好濃郁，d雞好入味，栗子仲好粉。有少少辣椒，不過唔算太辣。d汁好好味，送飯一流。