東京食堂 (已結業)

前幾日喺尖沙咀附近做完嘢，就周圍去搵嘢食。聽朋友推介，嚟咗呢間比較隱蔽嘅日本餐廳。佢嘅地點比較難搵，要通過大廈嘅入口通道先至會見到，如果唔係有朋友教我行都未必識得去。佢呢度嘅地方比較細，可能大概坐到十個人左右。我去嘅時候大概兩點幾，但係都仲有啲客人。坐左一陣就發現佢哋大部分都係熟客，因為佢哋同店員傾計傾得好開心，令我覺得好warm。我叫咗個蒲燒鰻魚飯($72)，佢係一個餐嚟嘅，就有半條鰻魚、一大碗飯再加麵豉湯。我唔算係細食嘅 女仔，所以呢個份量對我嚟講啱啱好。佢條鰻魚都好肥美，好好食，唔會好乾，燒得幾好。啲汁都好香甜，整體都令我好滿意。另外，加配嘅粟米粒都好有牛油香味。因為天氣比較熱，我之後仲叫咗杯芒果紅茶($16)。 店員好有心，最初佢攞咗第一杯出嚟嘅時候，佢覺得顏色有啲淡，擔心味道都會好淡，所以特登沖咗另一杯畀我，覺得好窩心。 其實幾好飲嘢，佢有好清新嘅芒果香甜，夏天飲非常之適合。總括嚟講，呢度係幾值得再去嘅，因為佢嘅價錢同食物質素成正比，覺得好抵食，而且店員嘅服務態度非常之好，待人有禮，十分親切，令餐廳有一種賓至如歸嘅感覺，難怪佢哋地點唔算方便但都有咁多熟客一去再去。