Kuro Shabu (已結業)

今日特登行上嚟呢間上環文武廟附近嘅Kuro Shabu，以為呢間餐廳較為無咁就腳人客會比較少啲，點知一行到入去竟然坐滿三分二，令我對今晚晚餐有好大嘅期望！憑我弱弱嘅日文估計，Shabu即係日式火鍋，果不其然餐廳菜單基本只有火鍋材料，不過係頂級食材！我同朋友一個叫左黑毛和牛A4一set同埋由師傅安排嘅Omakese。首先上嘅黑毛和牛由足外則肉、牛肩肉及上肩胛肉組成，師傅係面前張原塊牛肉用切割機切成薄片，保證係真和牛。原汁原味嘅和牛配上清新而唔會太酸嘅柚子醋，簡直係一流嘅配合！而一整晚令我最驚喜嘅一定係由師傅主理嘅Omakase！首先嚟嘅係A5黑毛和牛，啱啱食完A4已經覺得好正嘅我地一咬落去A5和牛之後發現完全係兩個景界！由西冷、上肩胛肉同肋肉眼所組成嘅A5和牛拼盤，食落去好似食緊一件鮮製嘅牛油咁甘香，同時保持著牛肉片應有嘅口感，從未試過嘅感受！跟住亦有豚肉拼盤及黑薩摩雞腿肉，雞肉每年有一定限制嘅供應量，食到並唔係一件易事！最後亦有專有嘅和風烏冬將頭先各種肉類嘅精華吸收，伴上新鮮野菜可以令吸收更加舒服。最後，餐廳特別提供抹茶雪糕作完美完結。