Uncle Miguel

營業中

休息中

自從幾年前去過墨西哥旅行之後，就發現原來墨西哥食物係好健康，好多蔬菜、粟米片、牛油果，全部都係清新易入口嘅開胃食物。今晚同朋友去中環搵食，上咗soho見到呢間墨西哥小店，就去試試先。首先叫咗碟脆粟米片伴番茄莎莎醬及青莎莎醬，啲莎莎醬酸咪咪真係好開胃，加埋脆香粟米片，永遠都唔夠喉。墨西哥芝士餡餅，裡面有啲烤肉，加埋我另一最愛嘅芝士，放上夾餅一齊食，配以牛油果醬同酸忌廉，又開胃又好食。因為一次過想食多幾款小食，就不如叫一份Taco platter，一次過可以食到仙人掌、雞、牛、豬、巴哈魚，仙人掌夠晒特別，再加上秘製醬汁相當滋味。甜品都相當出色，係炸油條配自家製焦糖醬，呢間餐廳做嘅churros都可謂相當正宗，同以前喺西班牙食過嘅質素都差不多，為今晚畫上完美句號。