甜心良品 (已結業)

食Sugar Ma Ma 前一天已plan好佢一開門就去食,因為恨食佢個朱古力軟心蛋糕好耐啦!當日真係晏晝12點過啲去到,但仲未開門過十多分鐘再去就開左啦!當時店內除左店員就冇其他人,咁又係,邊有人好似我咁早去食甜品?坐低望左個Menu一陣就叫野(其實一早諗好食朱古力軟心),叫左個細Size($29),因為得一個人,而雪糕要左蕃薯味.Order完後再睇Menu,發現原來話某啲甜品,包括朱古力軟心,係2pm後先供應!但係佢照整比我喎!!服務態度真係值得一讚!等左大概15分鐘,期待已久的朱古力軟心终於上枱.賣相非常吸引!一切開個朱古力軟心,朱古力熔漿慢慢流出黎,仲真係熱到出煙添呀,GOOD!!!首先試下朱古力熔漿.朱古力味濃但唔會太甜,而且仲係暖,真係名符其實暖心Mama呀!再試個蛋糕,朱古力熔漿同蛋糕一齊食仲好味,蛋糕整得好好,一啲都唔厚,又夠軟又有少少脆皮嘅感覺.至於個蕃薯味雪糕比預期好!!唔太甜但唔會覺得淡味,最好嘅就係唔覺"漏",如果朱古力軟心夾其他味雪糕反而可能會太"漏".所以甚至可以話個蕃薯味雪糕同朱古力軟心一樣咁正!!食完真係覺得好滿足!下次再黎試其他甜品先.