Three Dice Kitchen (已結業)

依間餐廳嘅特別之處係佢有部分嘢食係分子料理, 比較其他附近餐廳, 價錢都算合理, 平日去有晚餐set, 平均價錢70至80蚊連餐飲, 加埋餐湯都係15蚊, 好抵食。我同朋友都叫左個龍蝦汁海鮮意大利飯, 另加左個雞翼大家share, 到最後自己又再加多個分子料理嘅甜品試下。先試個龍蝦汁海鮮意大利飯, 飯煮得唔錯, 韌度適中, 唔會話太淋果隻,龍蝦汁亦煮得好好, 夠濃味夠creamy, 正! 幾十蚊有依個質素, 真係唔錯。炸雞翼, 小食首選, 熱辣辣金黃色, 咬落香脆, 睇得又食得。一客有四件, 兩個人分啱啱好。分子料理甜品係原味水晶球, 睇落似個燈膽, 裡面嘅成分主要係黃豆粉同黑糖蜜。食落就似啫喱, 幾得意吓。 整體嘢食唔錯, 有興趣或係果頭返工嘅話不妨去試試啦！