麵麵 (已結業)

今日同朋友一齊嚟到旺角呢一間麵麵， 其實我自己個人都好鍾食麵 尤其是鍾意食一啲湯麵同彈牙嘅麵。 因為自己食得多日本拉麵都悶，今日就想試下其他新款菜式。極品魚宴料理: 呢個魚麵包括有魚皮菜肉餃子、墨魚春卷、 魚肉春捲、魚蛋， 咁其實呢一個麵其他配料我覺得都幾好味，但係我最鍾意始終都係佢出名嘅魚麵，同埋佢個魚湯 ，因為佢個魚麵我覺得都幾爽口，幾彈牙同埋個質感唔錯 ，另外佢個湯亦都飲落好似幾有營養 ，我感覺上真係好似吸收咗好多骨膠原咁。XO雞翼拌魚烏冬： 呢個係我朋友order嘅咁我試咗隻雞翼， 隻雞翼幾好食，因為雞翼皮香脆肉熱，另外原來個魚麵配埋xo醬咁撈埋嚟食別有一番滋味辣辣地咁，所以感覺上唔錯，如果鍾意食辣嘢嘅朋友可以試下。Fish Nachos on the boat: 呢個魚皮我覺得可以試，因為個魚皮鋪埋我最鍾意食嘅牛油果加芝士，感覺上好似食緊pizza咁樣但係其實食緊魚皮，魚皮都好香脆，所以如果你哋叫咗啲酒精類飲品，呢個餸酒其實我覺得幾好。最後飲埋個凍水果紅茶， 講開又講呢個紅茶加埋啲水果飲我覺得都幾fresh。飲完我同朋友就走嚕。 如果大家鍾意食麵，大家可以試下呢一間。