TwoTwo Chicken (已結業)

TwoTwo Chicken，佢哋晌韓國有三十幾年歷史，可謂元祖級嘅韓式炸雞店，近日仲晌港島區開咗香港首間分店，估唔到選址竟然係沉實嘅小區 – 大坑。舖面面積唔大，水吧位已佔一大半，裝修似酒吧多過炸雞店。餐牌暫時只有一版兩面，主菜就係六款口味嘅炸雞，另加三款韓式料理，反而飲品嘅選擇仲多少少。試業期間所有口味嘅炸雞全隻$148，半隻$78一碟，呢日就試咗其中幾款。香蔥炸雞，表面嘅秘製醬汁食落有啲似蜜糖芥末（只係我覺得，無求證係咪真係加咗蜜糖芥末之類嘅調味料），上面嘅蔥絲既可提味，又可減去炸雞嘅膩感。甜辣炸雞，醬汁甜中有辣，同埋幾有辣勁，都幾惹味嘅。呢兩款炸雞外皮雖然蘸咗醬汁，不過都仲有啲脆度。麻辣炸雞，呢款係香港店獨家口味。麻辣度OK，唔死辣同埋幾香口，只係雞件有啲乾身。