Will's Coffee (已結業)

平時真係好少黎深水埗，今日去開深水埗個頭，順便黎呢間Will's Coffee買外賣。呢間Will's Coffee係coffee house，唔係普通cafe，主要提供健康少甜既食物同飲品。而家只做外賣，無堂食。呢度餐牌有牛角包，意粉，貝果(Bagel)，貝果漢堡，輕盈早餐，同一款甜品。咖啡種類好多，亦有非咖啡飲品同沙冰。番茄大蝦海鮮意粉 $88 番茄大蝦海鮮意粉有3隻去殻蝦，魷魚，蜆肉，蝦仔，番茄，洋蔥，最後撒上香草。意粉係扁意粉。外賣意粉隔左成半個鐘先返到個位食，意外哋意粉質地仲係好有咬口，而個意粉汁嘅味道調較得好好。蝦都仲係爽脆，而魷魚都係好脆身。外賣都差唔多食到堂食質素，唔錯。益力多柚子沙冰 跟餐 +$6跟餐包$34以下飲品，其他飲品補差價。我加錢升級做沙冰。見到店員用益力多再加柚子醬整，沙冰大大杯，益力多味酸酸甜甜中帶柚子甜味，仲有柚子皮食。沙冰基本上全部都係碎冰，係間中有一兩粒大少少。未到午市繁忙時間，外賣等左5至10分鐘就有。外賣跟餐具飲管，用個膠袋裝得企企理理，飲品有用紙兜固定位置，冇咁易整瀉。如果經過開都不妨一試。