踏入秋冬，想搵間採光度高、感覺溫暖嘅咖啡店，好好忙裡偷閒一下？今次幫大家精選三間澳門日光 Cafe，環境加分同時咖啡都有水準！
 

純白獨棟咖啡室  Fill Cafe

圖：餐廳IG

呢間咖啡店位於媽閣廟附近，樓高三層加上純白門面好易認。裝修風格以簡約自然為主，二樓採光好好，黃昏時候特別好 Feel！主打咖啡、甜品同輕食，包括打卡一流嘅巨型雞蛋布甸，成部電話咁大，焦糖帶回甘香味，兩個人開心 Share 嚟食啱啱好。
 

韓系天台咖啡店  Maison

圖：餐廳IG

氹仔連理巷樓上搵到呢間裝修走黑白簡約風格嘅 Cafe，加上有室外天台座位，一句講晒就係超啱打卡！佢哋嘅特調飲品好有特色，例如之前出嘅茉莉清萃以 Cold Brew 咖啡配搭茉莉青茶、味道清爽，下北澤就用泰式紅茶加上朱古力同牛奶、香甜柔滑。
 

行大賽車博物館兼嘆啡  Another Coffee

圖：餐廳IG

一年一度嘅格蘭披治大賽車啱啱過去，大家去睇比賽嘅時候，又有無留意到澳門大賽車博物館旁邊其實有間 Cafe？裡面唔單止有賽車元素嘅擺設，更有一排落地大玻璃，望住街景同朋友吹水或者一個人放空都好啱。咖啡之外亦有熱狗、蛋糕等輕食供應。