三元粥品專家

營業中

休息中

難得到澳門一日遊，咁梗係要食盡當地美食！睇返阿蘇去遊澳門嗰時講過呢間三元粥店，仲要大讚，咁我又梗係去試下啦。夜晚九點幾去到都有幾枱客。坐低唔使諗，即刻叫咗牛丸及朱肉丸粥各一碗﹗個伙計會問你加唔加蛋，我冇加，我朋友就加咗一隻﹗蛋係生打落碗粥度，粥到時一撥，仲可以見到未變色既透明蛋白﹗粥煲得好綿，試咗啖粥，果然夠香夠杰﹗粥底好靚，而肉丸既份量亦好多﹗兩款肉丸都係新鮮肉制成既，豬肉丸用半肥瘦豬肉所打成，仲依然可以食到一小點既肥膏喺當中，尚算彈牙﹗牛肉丸亦同樣新鮮彈牙，亦比豬肉丸少好多脂肪，但人嚟講就比較喜歡牛肉丸﹗其實我個人認為呢間粥店之所以好評如潮，都係因為香港人食得太多合成食物，好少可以喺粥店食到新鮮炮製既肉丸而已！老實講，呢間肉丸既味道只係不過不失，因為我喺另一個地方食過比佢更好既肉丸(都係指粥店)！