金利食店

營業中

休息中

過澳門嘅次數唔多，但有一個澳門嘅朋友介紹呢間金利咖哩雞米俾我，話呢間舖頭係佢中學嘅回憶。一場嚟到澳門，緊係去試試！經過門口，望落平凡，但門口有四，五個人等緊外賣。即刻入去坐低先！二話不說，兩個咖哩雞米啊唔該！雞米好快就到，同網上嘅相一樣，滿滿嘅一碗，好似就嚟瀉岀嚟咁。米線同雞嘅份量都唔少，就咁望已經有五舊雞。食之前試一啖湯汁，有濃郁嘅咖哩味，質地係黏稠嘅。之後將辣椒碎同湯汁混合，味道變得更深層次。開始食啦！雞件係一口嘅大小，對女仔嚟講啱啱好。食落少嫩，雞肉唔痴骨，好容易食。米粉一向唔係最掛湯嘅麵條，但呢個湯底夠稠，米粉夾起時完全可以掛到湯，啖啖都係濃郁嘅咖哩加辣椒溶嘅麻。總括嚟講，呢碗雞米味道夠哂特別，所有部分都有水準！推薦俾各位香港嘅朋友，過澳門嘅時候，要試下呢間澳門嘅特色野！