葡國美食天地

營業中

休息中

工作關係，美味子去左澳門幾日。是晚被安排去呢間小舖食晚飯，同事們話呢間餐廳曾經拎過星，好味又扺食而且仲要一早book定如果唔係會冇位。去到既時侯門口已經掛左全晚滿座既紙牌，門口企左幾個葡國人飲酒吹水，入到去有d葡式既裝飾同陣陣既食物香味，時間較得啱啱好，d野食已經一早為我地準備好上左係枱。今次係美味子第二次嚟食，馬介休係其中一樣美味子覺得必食既，因為真係好食過好多葡式餐廳，係香港既話更加唔使旨意食到呢個水準。其次炒蜆同冷盤八爪魚都係屬於必食系列，炒蜆冇港式大排擋嗰d咁濃厚但確實幾惹味開胃，會食唔停口。我地一大班人叫左幾個焗飯好快就清晒，味道唔太濃同唔油膩，仲有好香既蕃茄味所以好開胃，美味子我連橄欖都食埋。不過是晚最好味都係碟煎豬排加薯條，熱辣辣又脆卜卜既薯條加塊煎得脆口又薄身既豬扒，我地好快清完又再encore左多一碟。另外其實仲有佢地既Sangria都好好飲，落足生果非常鮮甜，好可惜我地好快就飲完冇機會俾美味子留低倩影；仲有木糠布丁都好地道，不過美味子就覺得太甜，食既時候要配返杯咖啡/茶就會好d。