新榮記咖啡麵食

營業中

休息中

一個咩都唔識嘅香港人，黎澳門想搵好野食，咪上網睇下囉。上網見到啲人話榮記豆腐面食嘅豆腐面出名。經過其中一個美食集中地天神巷，見到有間叫新榮記又都幾多人就入去試下啦。(唔知兩間有冇關係)一開頭咩都唔知，淨係知豆腐面出名，咪叫豆腐面($20碗)加杯熱豆奶(佢哋係咁叫，唔係叫豆漿)。望望下唔對路，冇人齋叫一餸喎，又見有幾個人嗌燻蹄，跟大圍實無死啦。加返個燻蹄先，咁拼就加$13。講下豆奶先，我嗌左大杯熱嘅，都幾甜，同埋幾稀，唔算好勁豆味，但都好飲。可能中午人多關係，都等左幾耐。碗面黎到，好正常嘅面，唔算太特別。豆腐係幾滑嘅，都算係有豆味。不過真係有啲齋。(所以，我後來發現有啲人會叫加咖喱汁，或者叫撈面，應該會惹面啲)反而，燻蹄係好有驚喜! 本身係凍嘅，加左啲麻油，食落好香，夾埋滑豆腐食，真係一絕! 同埋燻蹄本身唔肥膩，都幾有肉味! 可以一試燻蹄!如果我要再試，會叫燻蹄豆腐撈面!