富仕葡式美食

營業中

休息中

過大海辦點事，2點幾食午餐、跟住食雪糕，6點又食晚餐，食咩呢?妹子提議去雀仔園附近食葡菜，又好啫，好耐無食萄菜嚕。去到未夠鐘開門，在外邊長凳坐住等，差不多夠鐘就可以入去坐，店面細細，樓下大約可坐20人，樓上唔知有幾大嘞。因為一路keep住食嘢同飲嘢，大家都唔肚餓，目標為本，就點人氣的鮮忌廉薯蓉焗馬介休，同埋富仕燒雞釀飯，諗住食完叫返個木糠布甸，最後因為太飽無叫到。兩種食物都要焗，所以要等一些時間，但係每枱必點呢兩樣。等待期間欣賞吓牆上掛畫，傾吓謁都唔錯架。先來個鮮忌廉薯蓉焗馬介休香噴噴上桌，顏色有點金黃，用湯匙搯出一角，馬介休香味即時飄溢於空氣中，食落淡淡魚香，味道適中，口感creamy順滑，一人一啖，一口接一口，好快就KO曬成碟囉。正!富仕燒雞釀飯一上來店員就把它開背，翻開來發現最考功夫係去骨，如何脊柱和胸骨去掉而表皮保持完好呢?雞烤得皮脆肉嫰，好好食呀！飯粒有點濕，茄汁味較重，食味OK啦。好快滿坐架，外面已經有人等位。